Sunday, May 24, 2015

Babyshower og vanillukaka með banana- og karamellufyllingu.


Babyshower er veisla sem haldin er til heiðurs tilvonandi mæðrum. Líkt og nafnið gefur til kynna þá er hugmyndin með slíkri veislu að móðirin tilvonandi sé böðuð í gjöfum. Amerísk hefð að sjálfsögðu en mikil ósköp er gaman að halda svona boð, þetta er auðvitað bara afsökun fyrir kökuáti með vinkonum. Það hefur verið hefð í okkar vinahópi að halda slíkar veislur og ég verð að viðurkenna  að mér finnst fátt skemmtilegra en að plana slík boð. Í gær var svo komið að því að halda boð fyrir Fríðu vinkonu mína sem á von á lítilli dömu í næsta mánuði. Krúttlegheitin brutust út og það var nostrað við hvern bita, það ranghvolfa sjálfsagt margir augunum fyrir umstanginu en okkur þykir þetta svo skemmtilegt og allt sem gerir lífið skemmtilegra er af hinu góða. 

Eins og ég var búin að segja þá er sterk hefð fyrir veislum af þessu tagi í Bandaríkjunum og við hér á Íslandi mættum taka Kanann til fyrirmyndar. Einlæg, falleg og öðruvísi veisla sem gleður. 

Hér koma myndir af veislunni og uppskrift að vanilluköku með banana- og karamellufyllingu. 


Litlar berjaostakökur með hvítu súkkulaði, ég mun birta þessa uppskrift mjög fljótlega. 


Þessir súkkulaðibitar voru ómótstæðilegir, ég þarf að fá uppskriftina hjá Öglu vinkonu og birta hana hér. Brownies með jarðarberjafyllingu og súkkulaðimús. 




Mímósubarinn klár og barnakampavínið fyrir tilvonandi mömmurnar í kælingu


Nýtt uppáhald, litlar pönnukökur með bláberjasírópi og stökku beikoni 



Elísa Guðrún, Heiður, Silja Sif og Gyða


Fríða, Svava Mjöll og Bryndís 


Íris Elín dásamlega litla vinkona mín 


 Agla, Eva og Þórdís Kolbrún 



 Emilía og Sigríður Margrét 




Marengskossar með sítrónufyllingu og ferskum berjum. 



 Vanillukaka með banana-og karamellufyllingu


5 eggjahvítur (notið rauðurnar t.d. í lemon curd)
1 Brúnegg
240 ml mjólk
2 ½ vanilla extract (góð vanilla)
350 Kornax hveiti
400 g sykur
3 tsk lyftiduft
salt á hnífsoddi
170 g smjör, við stofuhita

Aðferð:

  • Hitið ofninn í 180°C.
  • Hrærið eggjum, mjólk og vanillu saman í skál, leggið til hliðar.
  • Sigtið saman hveiti og lyftiduft. (Með því að sigta mjölið saman verður það eins fínt og mögulegt er og kakan á auðveldara með að lyfta sér)
  • Blandið öllum þurrefnum saman og bætið smjörinu við í nokkrum pörtum, það tekur um það bil fjórar mínútur.
  • Bætið síðan eggjablöndunni saman við í þremur skömmtum, það er ágætis regla að stoppa af og til og skafa meðfram hliðum á skálinni svo allt blandist örugglega vel saman.
  • Smyrjið tvö hringlaga form og hellið deiginu í formin. Bakið við 25 – 30 mínútur við 180°C.
  • Kælið mjög vel áður en þið smyrjið kreminu á kökuna.


Vanillusmjörkrem og ljúffeng karamellufylling

250 g smjör
500 g flórsykur
4 msk rjómi (eða mjólk)
2 tsk vanilla extract
smá vanillusykur
matarlitur

Aðferð:

  1.  Hrærið saman smjör og flórsykri í 3 mínútur, bætið rjómanum og vanillu saman við í tveimur skömmtum.
  2. Kremið verður léttara og betra ef það fær að blandast vel saman, ég hræri það í um það bil fimm mínútur. Að þessu sinni notaði ég bleikan matarlit og bætti honum saman við í lokin. Wilton gel matarlitir eru í mínu eftirlæti.
  3. Ég skipti kreminu í tvennt, tók smá hluta sem ég ætlaði að nota sem fyllingu og sleppti að nota matarlit í þann hluta.


Karamellu- og bananafylling

6 stórar msk smjörkrem, ólitað
2 bananar
2 msk góð karamellusósa t.d. Dulce de leche

Aðferð:
  1. Blandið öllu saman í hrærivél í smá stund og smyrjið á milli kökubotnanna.
  2. Þekjið kökuna með smjörkremi og skreytið að vild.
  3. Best finnst mér að geyma þessa köku í kæli í svolitla stund áður en ég ber hana fram.




Þetta var frábær dagur með skemmtilegum vinkonum og hér má sjá fallegu vinkonu mína hana Fríðu sem verður mamma eftir nokkrar vikur. 

xxx

Eva Laufey Kjaran Hermannsdóttir 


Allt hráefni sem notað er í þessa uppskrift fæst í verslunum Hagkaups. 




Friday, May 22, 2015

Frönsk lauksúpa


Frönsk lauksúpa 

Galdurinn við góða lauksúpu er að leyfa lauknum að krauma í smjörinu í dágóðan tíma. Hér er uppskrift að bragðmikilli lauksúpu sem Eva Laufey eldaði í þætti sínum, Matargleði. 


400 g laukur
70 g smjör
1 msk hveiti
1 l kjúklingasoð
3 dl hvítvín
4 tímían greinar
3 lárviðarlauf
steinselja, magn eftir smekk
salt og nýmalaður pipar
baguette 
rifinn ostur 

Aðferð

  • Afhýðið lauk og skerið í þunnar sneiðar.
  • Steikið laukinn upp úr smjörinu, því lengur sem þið steikið laukinn því betri verður súpan. Hann á þó alls ekki að brenna heldur verða glær og gullinbrúnn.
  • Stráið hveitinu yfir laukinn og hrærið í.
  • Hellið soðinu og hvítvíninu saman við og látið sjóða saman.
  • Bætið kryddjurtum út í og leyfið henni að malla í 30 mínútur - 50 mínútur.
  • Hellið súpunni í skálar sem þola að fara inn í ofn, setjið eina brauðsneið ofan í hverja skál og stráið osti yfir. Bakið í ofni í nokkrar mínútur eða þar til osturinn er bakaður.


Berið súpuna strax fram og njótið

xxx

Eva Laufey Kjaran Hermannsdóttir

Sunday, May 17, 2015

Sunnudagsbaksturinn, ljúffeng Silvíu kaka.


Sunnudagsbaksturinn að þessu sinni er dásamleg Silvíu kaka en kakan þykir vera í eftirlæti hjá Silvíu, drottningu Svíþjóðar. Mér finnst þessi kaka mjög ljúffeng og ég bakaði hana ansi oft í fæðingarorlofinu mínu. Virkilega einföld og góð kaka sem ég mæli með að þið prófið. Það er bæði hægt að baka þessa köku í hringlaga formi og í ofnskúffu, en þá er ágætt að tvöfalda uppskriftina. 

Silvíu kaka

3 egg
3 dl sykur
1,5 dl kalt vatn
3 tsk lyftiduft
3 dl Kornax hveiti

Glassúr

100 g smjör
1, 5 dl flórsykur
2 eggjarauður
2 tsk vanillusykur

Kókosmjöl til skreytinga.

Aðferð: Þeytið saman egg og sykur þar til blandan verður létt og ljós. Sigtið hveitið og lyftiduftið saman við. Í lokin bætið þið vanillu og vatni við og hrærið í 1 – 2 mínútu. Smyrjið hringlaga form og hellið deiginu í formið (það er hægt að nota ofnskúffu en þá er ágætt að tvöfalda uppskriftina).

Bakið við 175°C í 20 – 22 mínútur.

Leyfið kökunni að kólna þegar hún er komin út úr ofninum og útbúið glassúr á meðan.

Bræðið smjör og bætið eggjarauðum, sykri og vanillusykri saman við og leyfið þessu að malla í smá stund. Hrærið vel í kreminu, þegar það er orðið þykkt og fínt þá er það tilbúið.


Dreifið kreminu yfir kökuna og skreytið með kókosmjöli. Þetta er klárlega kakan sem þið eigið eftir að baka aftur og aftur, hún er ekki bara einföld heldur er hún virkilega gómsæt. 

Njótið vel.

xxx

Eva Laufey Kjaran Hermannsdóttir 

Friday, May 15, 2015

Djúsí pizzur á þrjá vegu


Einfalt og gott pizzadeig sem hefur reynst mér mjög vel, það tekur enga stund að gera deigið en það þarf smá tíma til að lyfta sér. Á meðan deigið er að lyfta sér er gott að nýta tímann til góðra verka t.d. að útbúa áleggið sem fer ofan á pizzurnar. Ég elska góðar pizzur og þessar þrjár eru algjört lostæti, ég segi það satt. Vinkonur mínar komu í mat í síðustu viku og mér fannst tilvalið að bjóða þeim upp á pizzu, þær voru ánægðar með matinn og áttum við einstaklega skemmtilegt kvöld saman.  

Pizzadeig 

  • 2 1/2 dl volgt vatn 
  • 25 g þurrger 
  • 2 tsk hunang 
  • 2 msk ólífuolía 
  • 350 - 400 g brauðhveiti frá Kornax
Aðferð: Leysið gerið upp í volgu vatni og það er afar mikilvægt að gerið sé volgt. Bætið hunangi saman við og hrærið vel í. Þegar byrjar að freyða í skálinni er gerið klárt. Blandið olíu og hveitinu saman við í hrærivélaskál. Þið getið auðvitað hnoðað deigið í höndunum en mér finnst langbest að nota hnoðarann á hrærivélinni, það ferli tekur um það bil 4 - 6 mínútur. Deigið er tilbúið þegar það er orðið að kúlu og klístrast ekki við hrærivélaskálina. Setjið viskastykki yfir skálina og leyfið deiginu að hefa sig í klukkustund. 




Pizza með hráskinku

  • 1 pizzadeig
  • 1 skammtur pizzasósa (mér finnst líka gott að setja tómata passata)
  • Rifinn ostur 
  • 1 bréf hráskinka ca. 8 sneiðar
  • Klettasalat, magn eftir smekk
  • Hægeldaðir tómatar (Skerið kirsuberjatómata í tvennt og leggið þá í eldfast mót, hellið smávegis af olíu yfir og kryddið til með salti og pipar. Bakið í ofni við 150°C í 1,5 - 2  klst. Því lengur sem þeir eru í ofninum því betri verða þeir)
  • Parmesan ostur 
  • Salt og nýmalaður pipar 
Aðferð: Fletjið út pizzadeigið og leggið á pappírsklædda ofnplötu. Smyrjið botninn með sósunni og dreifið rifnum osti yfir. Setjið hráskinku yfir og bakið við 220°C í 10 - 12 mínútur. !Ofnar eru auðvitað misjafnir og það gæti verið að þið þurfið að baka hana lengur en pizzan er klár þegar pizzan er gullinbrún og hráskinkan stökk. 





Pizza með forsteiktu beikoni og rjómaosti 

  • 1 pizzadeig 
  • 1 skammtur pizzasósa (mér finnst gott að nota tómata passata)
  • Rifinn ostur 
  • 100 g forsteikt beikon 
  • Rauð paprika, smátt skorin 
  • Hreinn rjómaostur, magn eftir smekk 
  • Salt og nýmalaður pipar
  • Fersk basilíka
Aðferð: Fletjið út pizzadeigið og leggið á pappírsklædda ofnplötu. Smyrjið botninn með sósunni og dreifið rifnum osti yfir. Steikið beikon og þerrið á eldhúspappír, raðið því á pizzuna og dreifið paprikunni yfir. Setjið nokkrar matskeiðar af rjómaosti á pizzuna og verið ekkert að spara hann. Bakið við 220°C í 10 - 12 mínútur. !Ofnar eru auðvitað misjafnir og það gæti verið að þið þurfið að baka hana lengur en pizzan er klár þegar pizzan er gullinbrún. Þegar pizzan er komin út úr ofninum er gott að setja nokkur fersk basilíkulauf yfir. 



Vinsælasta pizzan í boðinu

  • Einn skammtur pizzadeig
  • 1 dós sýrður rjómi 
  • 1 villisveppaostur
  • 1 hvítlauksrif
  • Salt og nýmalaður pipar
  • 200 g sveppir steiktir upp úr smjöri og hvítlauk
  • Hægeldaðir tómatar
  • Smátt söxuð steinselja
Aðferð: Fletjið út pizzadeigið og leggið á pappírsklædda ofnplötu. Rífið niður villisveppaostinn og hrærið saman við sýrða rjómann, pressið hvítlauksrifið og blandið saman við. Kryddið til með salti og pipar. Smyrjið ostablöndunni á botninn.

Steikið sveppina upp úr smjöri og pressið eitt hvítlauksrif út í pottinn, þerrið sveppina vel áður en þið setjið þá á pizzuna. Bakið við 220°C í 10 - 12 mínútur. !Ofnar eru auðvitað misjafnir og það gæti verið að þið þurfið að baka hana lengur en pizzan er klár þegarr hún er gullinbrún. Það er mjög gott að setja hægeldaða tómata og smátt saxaða steinselju yfir pizzuna í lokin.  









Það þarf alltaf að vera eftiréttur, ljúffengt vanillu pannacotta með hvítu súkkulaði. 

Ég mæli með að þið prófið þessar pizzur og njótið, helst í góðra vina hópi. 

xxx

Eva Laufey Kjaran Hermannsdóttir 

Lax í pekanhnetuhjúp


Lax er með því hollara sem við getum í okkur látið og er hann sannkölluð ofurfæða. Það er hægt að matreiða lax á marga vegu og er hann sérstaklega bragðgóður bakaður í ofni. 


1 laxaflak
gróft sjávarsalt
nýmalaður svartur pipar
hunangs djion sinnep

Hnetuhjúpur

100 g hnetur t.d. hesli og pekanhnetur
4 msk brauðrasp
steinselja
börkur af einni sítrónu
1 msk olía
2 hvítlauksrif, fínt rifnir
sjávarsalt

Aðferð

  • 1.    Hitið ofninn í 180°C.
  • 2.    Snyrtið laxaflakið og setjið í eldfast mót eða á pappírsklædda bökunarplötu.
  • 3.    Kryddið laxinn til með salti og pipar og penslið sinnepinu yfir hann. Dreifið hnetuhjúpnum yfir og þjappið honum vel ofan í sinnepið með hönfunum, þannig að hann haldist vel á. Bakið í 15 mínútur. Takið þá laxinn út úr ofninum og látið hann standa í 5 mínútur áður en þið berið hann fram en þannig eldast hann aðeins lengur.
  • Berið fiskinn fram með fersku salati og jógúrtdressingu. 



Jógúrtdressing

2 dl grískt jógúrt
1 hvítlauksgeiri
1 msk hunangs dijon sinnep
smátt söxuð steinselja
salt og pipar

Aðferð

Blandið öllu saman og bragðbætið með salti og pipar.

Ég vona að þið njótið vel.

xxx

Eva Laufey Kjaran Hermannsdóttir