Fimm dásamlegir réttir sem henta vel í Eurovision partíið. Áfram Ísland!

 Sweet chili ídýfan er alltaf rosalega góð og sérlega einföld, það sem þarf í þessa ídýfu er sýrður rjómi og sweet chili sósa. Magnið fer auðvitað eftir því hvað þið ætlið að bjóða mörgum í teitið, ég er yfirleitt með eina dós af sýrðum rjóma og sáldra vel af sósunni yfir. Dásamlega gott með Doritos. 

 Þessi sælgætiskaka er syndsamlega góð  og er af einföldustu gerð. Uppskriftin er hér. 

 Fersk og góð ídýfa sem slær alltaf í gegn. Uppskriftin er hér.

 Sumar í skál. Ég gerði þessa skál fyrir grillblað Gestgjafans í fyrra og hef gert hana margoft fyrir fjölskyldu og vini, á bara enga almennilega mynd. Þær eru svo dökkar sem ég á, þannig ég átti þessa mynd af blaðinu síðan í fyrra og hún fær að duga. Epla pæið er sömuleiðis dásamlegt og þið finnið uppskriftina hér. 

Þessi skál er algjört augnayndi á borði og algjört æði. Fátt betra en ferskir ávextir með súkkulaði. 

1 Banani

1 Vatnsmelóna

100 grömm vínber

8 - 10 jarðaber

2 Kíví

Ferskur ananas

Grillpinnar

100 grömm hvítt súkkulaði

100 grömm dökkt súkkulaði

Skerið ávextina smátt niður, raðið þeim á grillpinna. Bræðið súkkulaði yfir vatnsbaði og dreifið yfir ávextina. Setjið inn í kæli í 20 - 30 mín. Skerið vatnsmelónu í tvennt og notið einn helming sem skál fyrir ávextina.

Stingið ávaxtapinnum í melónuskálina, skreytið að lokum skálina með alls konar ávöxtum og berjum. Dreifið að lokum smá flórsykri yfir skálina og njótið.

Ritz kex hjúpaður Camenbert, ég legg ekki meira á ykkur. Þetta er algjör sæla og uppskriftina finnið þið hér. 

 Ég hlakka mikið til morgundagsins, í fyrsta sinn í mörg ár held ég ekki júróteiti en ég ætla samt að horfa á keppnina og vona auðvitað að Eyþór komist sem lengst. Hann var frábær í gær og mikið sem ég er ánægð með að við komumst áfram. Áfram júróið og áfram Ísland! 

Góða helgi kæru vinir. 

xxx

Eva Laufey Kjaran

Besti afmælisdagurinn.

 Ég er mjög mikið afmælisbarn og finnst ótrúlega gaman að eiga afmæli, eins og flestum. Ég vaknaði eldsnemma og borðaði köku með fjölskyldunni minni. Þau stungu svo af til New York og Haddi stakk af í vinnu svo ég fór suður og hitti elskulega vini mína. Ég tók auðvitað nokkrar myndir sem ég ætla að deila með ykkur.

  Borðuðum ljúffengan mat á Borginni, ég mæli svo sannarlega með Fjarkanum á matseðlinum. 

 Elskulegu vinir mínir sem ég er svo heppin að eiga. Nafnahringur, byrjum til hægri. Erna Guðrún, ég, Guðrún Selma, Stefán Jóhann, Sara Karen, Vera Líndal, Guðrún Sóley, Anna Margrét, Eva og svo loks Fríða mín. 

 Ég var svo heppin að fá afmælisköku sem smakkaðist ótrúlega vel. 

 Ég kom með teppi og köku, ferðinni var heitið á Austurvöll þar sem við sátum og borðuðum köku í góða veðrinu. 

 Seinnipartinn var komið að því að kveðja Stúdentaráð, setu minni er lokið í ráðinu eftir þrjár góðar annir. Ég var formaður Menntamálanefndar og sat í Stúdentaráði, mikil ósköp sem ég er þakklát fyrir þann tíma sem ég fékk að vinna með frábæru fólki og þau hér að ofan eru í sérstöku uppáhaldi. Kippan dásamlega, fyrir rúmum tveimur árum þá þekktumst við ekki neitt en í dag erum við ótrúlega góðir vinir og ég er rík að hafa kynnst þessu fólki sem mér þykir svo vænt um. 

Dagurinn var semsé algjörlega frábær og endaði á vídjóglápi með manninum mínum sem var mjög huggulegt. Það er svooo gaman að eiga afmæli, þá sérstaklega ef maður hefur tækifæri á að eyða deginum með svona góðu fólki. 

xxx

Eva Laufey Kjaran

Ofnbakað spaghetti með ljúffengum kirsuberjatómötum

Ég borða mjög mikið af pasta og spaghettí, það er hægt að búa til svo marga rétti úr þessu dásamlega hráefni. Þegar að ég hef ekki mikinn tíma til þess að elda þá enda ég oftast á því að útbúa fljótlegan pasta/spaghettírétt. Á tyllidögum er líka mjög gott að fá sér rauðvínsglas með matnum og njóta í góðra vina hópi. Mig dreymir um að heimsækja Ítalíu einn daginn og borða mig í gegnum landið, pasta, pítsur og rauðvín í öll mál. Fer vonandi til Ítalíu fyrr en síðar. 

Þessi réttur sem ég ætla að deila með ykkur í dag er svakalega einfaldur og ljúffengur, brauðstangirnar sem þið sjáið á myndinni hér fyrir ofan bakaði ég í Salt eldhúsi þegar ég fór á bakstursnámskeið hjá þeim. Ég hef verið að prófa mig áfram í brauðbakstrinum og er komin með margar góðar uppskriftir í matreiðslubókina mína. 

Ofnbakað spaghettí með ljúffengum kirsuberjatómötum

1 pakki spaghettí 

ólífuolía

1 askja kirsuberjatómatar, skornir í tvennt

3 hvítlauksrif, smátt söxuð

1 meðalstór rauðlaukur, smátt saxaður

1/2 rautt chili, fræhreinsað

1 krukka maukaðir tómatar, ég kaupi frá Sollu. 

1/2 kjúklingateningur

skvetta af agave sírópi

handfylli smátt söxuð basilíka

handfylli klettasalat 

ferskur Parmesan ostur

sjávarsalt og pipar 

Hitið vatn í potti ásamt sjávarsalti og olíu. Þegar vatnið er farið að bullsjóða þá setjið þið spaghettíið saman við og sjóðið samkvæmt leiðbeiningum á pakkanum. Á meðan að spaghettíið er að sjóða þá útbúum við tómatana og sósuna.

Skerið kirsuberjatómatana í tvennt og raðið á bökunarpappír. Sáldrið salti, pipar og ólífuolíu yfir og setjið í ofnskúffu og bakið í ofni við 200°C í 10 - 12 mínútur. 

Sósan er mjög einföld og bragðmikil, ég geri þessa sósa mjög oft þegar að ég er með spaghettí eða pasta. Þetta er sósa sem gengur við allt! 

Byrjið á því að hita olíu við vægan hita á pönnu, mýkið hvítlaukinn, rauðlaukinn og chili í olíunni. Bætið því næsta maukuðu tómötunum, kjúklingakrafti og skvettu af agave sírópi. Kryddið til með salti og pipar. Hér er auðvitað algjör skylda að smakka sig til og frá. Spaghettíið ætti að vera tilbúið svo þið losið frá vökvann og bætið spaghettíinu út í sósuna. 

Bætið basilíku og klettasalati saman við og blandið þessu vel saman. 

Hellið öllu í eldfast og bætið kirsuberjatómötunum saman við, rífið niður Parmesan ost og duglega af honum. Bakið í ofni við 180°C í 13 - 15 mínútur. 

Berið réttinn fram með góðu brauði og rífið duglega af ferskum Parmesan osti yfir. Þetta er stórgóð máltíð sem er í miklu eftirlæti hjá mér. Það er líka mjög gott að bæta t.d. tígrisrækjum og kjúkling saman við. Prófið ykkur áfram og njótið vel kæru vinir. 

xxx

Eva Laufey Kjaran

Lífið Instagrammað

 1. Veðrið er orðið mjög fínt og þá er sko í lagi að færa sig út til þess að skrifa bókina mína. 

2. Langisandur fallegur.

 3. Er komin á mjög gott skrið með bókina og hún er farin að taka á sig ágæta mynd.

4. Fór á myndlistarsýningu hjá hæfileikaríku vinkonu minni henni Veru Líndal. 

 5. Bakaði bláar og fallegar makrónur um helgina, uppskriftin kemur inn á bloggið í vikunni. 

 6. Mexíkósk grillveisla í Gestgjafanum sem ég sá um, mæli með grillblaði Gestgjafans. 

7. Bleikar og sætar bollakökur á leið í ferðalag. 

 8. Í gær bjó ég til fimm ljúffeng salöt fyrir næsta tölublað Gestgjafans, mjög skemmtilegt verkefni og nú er ég á fullu að skipuleggja salatþáttinn fyrir bókina mína. 

9. Fallegi bleiki kökudiskurinn sem mamma gaf mér þegar þau komu heim áðan, miiiikið sem það er gott að hafa þau heima. 

Það er búið að vera mjög mikið að gera hjá mér og ég hef ekki haft mikinn tíma til þess að blogga og það þykir mér mjög leiðinlegt. Ég ætla að deila með ykkur nokkrum uppskriftum í vikunni og vonandi næ ég að setja inn eina í fyrramálið. 

Á meðan að það er lítil hreyfing á blogginu þá getið þið auðvitað fylgst með mér á Instagram, ég læt inn mikið af myndum og ykkur er guð velkomið að fylgjast með. Þið finnið mig undir evalaufeykjaran. 

xxx

Eva Laufey Kjaran

Uppáhalds vikan mín.

Það var erfitt að vakna í morgun eins og gengur og gerist eftir gleðilega helgi, átti stórgóða helgi sem fór í bókarskrif og huggulegar stundir með vinum. Í gærkvöldi fór ég á leiksýningu hjá Brekkubæjarskóla og hún var frábær, krakkarnir eru svo hæfileikaríkir og sýningin mjög skemmtileg. Gamli skólinn minn á mikið hrós skilið. 

Nú er ný vika gengin í garð og þetta er uppáhalds vikan mín á árinu, afmælisvikan í fjölskyldunni minni. Sonur systur minnar á afmæli, ég á afmæli og mamma verður fimmtug á laugardaginn. Svo er auðvitað eurovision, sem er í sérlega miklu uppáhaldi hjá mér. Þannig þetta verður heldur betur skemmtileg vika, rúsínan í pylsuendanum er auðvitað að hluti af fjölskyldunni minni er að koma heim á morgun. 

En það nóg að gera í dag svo nú reynir á að vera skipulögð. Ég vona að þið eigið góða viku framundan kæru vinir.  

xxx

Eva Laufey Kjaran

Mexíkósk grillveisla í Gestgjafanum.

 Grillblað Gestgjafans kom í búðir á dögunum og í blaðinu er m.a. að finna mexíkóska grillveislu eftir mig. Það er ár frá því að ég fékk að spreyta mig í fyrsta sinn hjá Gestgjafanum og ég hef gert nokkra þætti síðan þá fyrir blaðið en ég verð að segja að þessi þáttur er í miklu eftirlæti. Ég var búin að vera með þessa hugmynd lengi í maganum því þetta er akkúrat grillveisla að mínu skapi og ég hlakka til að bjóða fjölskyldu og vinum í grillveislur í sumar. 

.

Hressandi margaríta, nachos fjall, risarækjur á grillspjóti og meira til í mexíkósku grillveislunni. Uppskriftirnar eiga það sameiginlegt að vera fremur einfaldar, fljótlegar og gómsætar. 

Ég mæli svo sannarlega með að þú nælir þér í eintak, blaðið er yfirfullt af gómsætum uppskriftum. 

xxx

Eva Laufey Kjaran

Sumarsæla á Akranesi.

 Akranes skartar sínu fegursta í dag, ég vaknaði snemma og ætlaði aldeilis að skrifa á fullu en gat ómögulega verið inni á meðan veðrið er svona gott. Ég fór því með Hadda í Kalla bakarí sem er frábært bakarí hér á Skaganum. Þegar þið komið upp á Skaga í sumar þá mæli ég með að þið farið í Kalla bakarí og fáið ykkur kringlu, kókómjólk og gamaldags kleinuhring. Ég hef fengið mér þessa þrennu frá því að ég var mjög lítið og það var algjör nauðsyn að nesta sig upp í Kalla bakarí áður en maður fer á Langasand. Ef þið hafið ekki komið upp á Skaga þá vitið þið kannski ekki af perlunni okkar, sem er Langisandur.

 Dásamleg strönd og svæðið í kring er frábært.  Aggapallur er í sérlegu uppáhaldi og ég tók nokkrar myndir áðan til þess að sýna ykkur þessa sælu sem er að finna á Skaganum. 

 Á Aggapalli er hægt að kaupa veitingar á sumrin, vöfflurnar með rjómanum eru í mínu uppáhaldi. 

 Sjáið þið þetta útsýni? Þarna beint á móti er Reykjavíkin. 

 Það er mikið og gott skjól á pallinum, tilvalið að koma hingað með vinum og njóta þess að sitja í sólinni. 

Það er meiriháttar lúxus að vera á Skaganum á svona dögum. Ég mæli nú með því að þið takið rúnt upp á Skaga í sumar, ekki nema 40 mínútur að keyra úr Reykjavík. Hér er glæsilegt tjaldsvæði, frábær golfvöllur (hef ég heyrt, ég hef ekki vit á golfi), Akrafjallið okkar fína, skógræktin okkar, góðir matsölustaðir, Langisandur, Aggapallur og svo mætti lengi telja. Svo er líka mikið fjör að kíkja á fótboltaleiki, ÍA ætlar að taka deildina með trompi í sumar. Sjáiði bara til! 

Njótið dagsins kæru vinir og kíkið fljótlega upp á Skaga í huggulegheitin. 

xxx

Eva Laufey Kjaran